ор

(Траншея)

бір жағында немесе екі жағында топырақ қалқаны бар, ені тар, ұзынша келген шұңқыр. О. қорғаныс құрылысы ретінде, ең алдымен мотоатқыштар бөлімшелерінің атыс позициясы қызметін атқарады, сондай-ақ жеке құрам мен материалдық бөліктер үшін оларды қарапайым жою құралдарынан және ядролық жарылыстың зақымдаушы факторларынан едәуір дәрежеде қорғайтын пана болып табылады. Сонымен қатар О. майданды бойлай қатынас құралы ретінде қолданылады және мотоатқыштар бөлімшелерінің өз бекіністерінде бүркеніп орналасуы үшін қолайлы жағдай жасайды. Ұрыстық жағдайда О-ларда барлаушылар, автоматшылар, пулеметшілер үшін ұялар, пулеметтік және минаатарлық алаңдар, атыс саңылаулары, қатынас жолдары, паналар (қуыстар, жертөлелер және т.б.) жабдықталады. Толық профильді олардың тереңдігі 110—150 см-ге жетеді. О. жергі-лікті жер жақсы көрінетіндей етіп және 400 м-ден артық жерге атыс жүргізетіндей болып орналастырылады. О-ды биіктіктердің алдыңғы және артқы көлбеулерінде орналастыруға болады, ең оңтайлы жер ұрыстық қырат болып келеді. О. сынық немесе қисық сызықты түрде жасалуы қажет. О. қолмен немесе ор қазатын машиналармен қазылады.